Livan parlamentinin sədri Nəbih Berri İsrailin atəşkəs rejimini pozmasına son qoymağa və yəhudi dövlətinin qoşunlarını Livan ərazisindən çıxarmağa çağırıb.
“İsrail işğalçı qüvvələri təcavüzkar hərəkətlərini davam etdirir və ötən həftə müəyyən edilmiş atəşkəs rejimini 54 dəfə pozub”, – spiker X (keçmiş Twitter) açıqlamasında bildirib.
Onun sözlərinə görə, “İsrail buldozerləri sərhəd kəndlərində evləri sökməyə davam edir, ərazini artilleriya atəşinə tutur, təyyarələr isə Livan ərazisinin dərinliklərinə uçur”.
“Biz BMT Təhlükəsizlik Şurasının 1701 saylı Qətnaməsinin İcrasına Nəzarət üzrə Texniki Komitənin diqqətini bu çoxsaylı pozuntulara cəlb edir və işğalçıları Livan torpaqlarını tərk etməyə məcbur etməklə onlara son qoyulmasını xahiş edirik”, – Berri vurğulayıb. (Tass)