Livan beynəlxalq hüquqa sadiqdir və BMT Təhlükəsizlik Şurasının 1701 saylı qətnaməsinə uyğun olaraq cənub sərhədində atəşkəs tələb edir. Bunu Beyrutda açılmış Yaxın Şərqdə sülh və təhlükəsizlik problemlərinə həsr olunmuş konfransda çıxış edən respublikanın baş naziri Nəcib Mikati deyib.
“Livan İsrailin öz suverenliyinə, milli ləyaqətinə və ərazi bütövlüyünə qəsd etməsini qəbul etmir”, – deyə siyasətçi vurğulayıb: “Sülh, ədalət və beynəlxalq qanunilik bizim seçimimiz olub və qalır.
Mikatinin iddia etdiyi kimi, “İsrailin Livanın cənubuna hücumları, onun sakinlərini qəsdən öldürməsi, şəhərlərin dağıdılması və əkin sahələrinin yandırılması tam mənada terror təcavüzüdür”. “Biz hesab edirik ki, beynəlxalq ictimaiyyət İsrailin bu cinayətkar siyasətinə son qoymalı, təcavüzkarın qarşısını almaq və cənub sərhədində sakitliyi bərpa etmək üçün tədbirlər görməlidir”.
Baş nazir hərbi əməliyyatlar nəticəsində cənub bölgəsinin əhalisinin 75%-nin dolanışıq imkanlarını itirdiyi, 100 min nəfərinin isə köçkün düşdüyü məlumatlara istinad edib. Hərbi eskalasiya 2023-cü ilin oktyabrında başlayandan bəri İsrailin Livanın cənubuna reydləri və atəşi nəticəsində 97 sakin həlak olub, 1200 nəfər yaralanıb. (Tass)