İsrail atəşkəsi pozur və Livanın quruda, dənizdə və hava məkanında suverenliyini pozmaqda davam edir. Bu barədə Livan ordusu komandanlığının X-də yayılan bəyanatında deyilir.
“Atəşkəs razılaşması üzrə öhdəliklərini yerinə yetirməyən İsrail düşməninin davam edən hücumları Livan və Yaxın Şərqdə sabitliyi təhdid edir”, mətndə vurğulanır.
Orada deyilir ki, İsrail Livan ərazisində qoşunlarının fevralın 18-də geri çəkilmədiyi beş ərazini qanunsuz olaraq işğal etməkdə davam edir. Son günlər İsrail qüvvələri ölkənin cənubunda və Bekaa vadisində mülki əhalinin itkisi ilə nəticələnən bir neçə hədəf əməliyyatı həyata keçirib. Cümə axşamı İsrail pilotsuz uçan aparatının Tell-Nahhas və Burj əl-Muluk arasındakı magistral yolu atəşə tutması nəticəsində bir nəfər ölüb, iki nəfər yaralanıb. (Tass)
