Məktəbəqədər və Ümumi Təhsil üzrə Dövlət Agentliyi və Azərbaycan Dövlət Pedaqoji Universitetinin Strateji İnkişaf Mərkəzinin birgə təşkilatçılığı ilə həyata keçirilən “Məktəbəqədər təhsildə liderlik” proqramının II çağırışı üzrə qeydiyyat prosesi başa çatıb.
Universitetdən AZƏRTAC-a bildirilib ki, proqramın qeydiyyat prosesinə paytaxt da daxil olmaqla müxtəlif regionlardan 700-dən çox şəxs müraciət edib.
Xatırladaq ki, proqrama seçim prosesi elektron sənəd qəbulu və müsahibə mərhələlərindən ibarətdir. Elektron sənəd qəbulu üçün namizədlərdən pedaqoji sahədə ali təhsil, dövlət məktəbəqədər təhsil müəssisələrində azı 3 illik iş təcrübəsi tələb olunur.
Proqramda məktəbəqədər təhsil müəssisələrində təlim-tərbiyə prosesinin təşkili və idarə olunması, sənədlərlə işin təşkili, liderlik səriştələrinin artırılması prioritet istiqamətlər olaraq nəzərdə tutulub.
Proqramda iştirak hüququ qazanmış namizədlərə müvafiq məlumat avqustun 29-31-də elektron poçt vasitəsilə göndəriləcək.