Yaponiyada aparılan araşdırmalar göstərib ki, buludlarda insan sağlamlığı üçün zərərli olan mikroplastiklər var.
Yaponiyanın Vaseda Universitetində aparılan araşdırmada buludlarda mikroplastiklərin varlığı araşdırılıb.
Araşdırmada tədqiqatçılar Fuji və Oyama dağlarından 1300 ilə 3 min 776 metr yüksəklikdəki buludlardan nümunələr toplayıb və qabaqcıl görüntüləmə üsulları ilə bu nümunələri araşdırıblar. Nümunələrin tədqiqindən sonra buludlarda 9 fərqli polimer növü aşkar edilib.
Buludlarda hər litr su buxarında orta hesabla 6,7-13,9 mikroplastik hissəcik olduğunu təyin edən tədqiqatçılar bu vəziyyətin iqlimə təsir edə biləcəyinin vurğuladılayıblar.
Tədqiqatçılardan biri Hiroşi Okoçi deyib: “Əgər “plastik havanın çirklənməsi” problemi həll edilməsə, iqlim dəyişikliyi və ekoloji risklər baş verə bilər və gələcəkdə ətraf mühitə geri dönməz ciddi ziyan vura bilər”.
Araşdırmanın nəticələri “Environmental Chemistry” jurnalında dərc olunub. (TRT Haber)
