1979-cu ildə fəaliyyətə başlayan, dəniz səviyyəsindən 1173 metr hündürlükdə yerləşən Duzdağ Müalicə Mərkəzi bu gün ən müasir şəraiti ilə Naxçıvanda müalicə turizminin inkişafına əvəzsiz töhfələr verir.
AZƏRTAC-ın bölgə müxbiri xəbər verir ki, labirint şəklində, ümumi uzunluğu 46 kilometr olan Duzdağın yeraltı hissəsi girişdən 360 metr məsafədə, 110 metr dərinlikdədir. Burada ilin bütün fəsillərində havanın temperaturu 18-20 dərəcə, nisbi rütubət 25-30 faiz arasında dəyişir, atmosfer təzyiqi 678 millimetr civə sütunu təşkil edir. Bu məkanın duzu bir çox xəstəliklərin, o cümlədən bronxial astma infeksion allergik forma və atopik forma, astmatik komponentli xroniki bronxitin remissiya fazası, kəskin və xroniki bronxitlər, predastma yeni astma öncəsi xəstəliklər, allergik rinosinusopatiyalarda faydalıdır.
Naxçıvan şəhərindən 13 kilometr, 5 ulduzlu “Duzdağ” otelindən isə 1 kilometr məsafədə yerləşən Duzdağ Müalicə Mərkəzində xəstələr üçün 474 çarpayı var. Sağlamlıqlarına qovuşmaq istəyən xəstələrin mərkəzdə qalma müddəti fərqlidir. Belə ki, 10 yaşına qədər uşaqlar günorta 4-5 saat olmaqla 7-14 günə kimi qalır, 12 yaşından yuxarılar isə axşamı burada gecələyirlər. Hər il xarici qonaqların dili ilə desək bu yeraltı krallığı ən azı 4-5 min insan ziyarət etməklə yanaşı, müalicələrlə də şəfa tapır.