Bir sıra humanitar təşkilatlar və QHT-lər Qəzza zolağına yardım çatdırmaq və anklavın blokadasını yarmaq üçün böyük beynəlxalq aksiya hazırlayır. Bu barədə TASS-a Qəzza zolağında şöbəsi olan Türkiyənin iri humanitar təşkilatı İHH-nin (İnsan Hüquq və Azadlıqları Müdafiə və Humanitar Yardım Fondu) rəhbərliyindəki mənbə bildirib.
“Hazırda 2010-cu ildəki “Azadlıq Donanması”na bənzər yeni humanitar aksiyanın hazırlanması üzərində iş gedir. Bu aksiyada təkcə biz İHH deyil, dünyanın hər yerindən digər humanitar təşkilatlar, fəallar, QHT-lər də iştirak edir. Bu, Avropa və dünyanın digər ölkələrindən nümayəndələrin iştirak edəcəyi Qəzza üçün ən böyük beynəlxalq aksiya ola bilər. Məqsədimiz blokadanı yarmaq və yardım çatdırmaqdır, lakin blokadanı yarmağın mümkün olub-olmayacağı regiondakı reallıqlardan asılıdır. “, – mənbə bildirib.
O qeyd edib ki, “Hazırda potensial iştirakçılarla bu aksiyanın necə və konkret hansı formatda həyata keçiriləcəyi ilə bağlı görüşlər və danışıqlar aparılır”.