Hakim partiyanın “FİDES – Macarıstan Vətəndaş Birliyi” fraksiyası fevralın 26-da İsveçin NATO-ya daxil olması haqqında sazişin ratifikasiyası ilə bağlı Macarıstan parlamentində səsvermənin keçirilməsini təklif edib. Bu barədə fraksiya lideri Mate Koçsis məlumat verib.
O, bu təkliflə Macarıstan parlamentinin sədri Laszlo Kövere məktub göndərib. “Biz parlamentin fevralın 26-da keçiriləcək iclasının gündəliyinə İsveç Krallığının Şimali Atlantika Müqaviləsi Təşkilatına daxil olması haqqında sazişin ratifikasiyası məsələsinin daxil edilməsini təklif edirik”, – fraksiya lideri müraciətində yazıb. Koçsis öz Facebook səhifəsində sənədin fotosunu dərc edib.
Fevralın 26-sı Macarıstan parlamentinin qış fasiləsindən sonra ilk iş günü olacaq. Gündəliyin müəyyən edilməsinə cavabdeh olan Köverin yaz sessiyasının açılışında Fides fraksiyasının təklifini səsverməyə çıxaracağı gözlənilir. Kiçik partnyorları olan Xristian Demokratlarla birlikdə partiya parlamentdə üçdə iki səs çoxluğuna malikdir, ona görə də onun təklifinin təsdiqlənməsi mütləqdir. Müxalifət partiyaları da uzun müddətdir ki, İsveçin təklifinin mümkün qədər tez ratifikasiya olunmasını müdafiə edirlər. (Tass)