Macarıstan Rusiyadan enerji təchizatını davam etdirəcəyinə və bunun üçün lazımi hüquqi şəraiti təmin edəcəyinə dair təminat alıb. Bu barədə Macarıstanın xarici işlər naziri Peter Sijarto Rusiya baş nazirinin müavini Aleksandr Novakla telefon danışığından sonra məlumat verib.
“Biz Macarıstan-Rusiya enerji əməkdaşlığının vəziyyətini nəzərdən keçirdik və belə bir qənaətə gəldik ki, Rusiyadan neft və qaz Macarıstana maneəsiz axmaqda davam edir”, – XİN rəhbəri Facebook-da yazıb. O, buna görə həmsöhbətinə təşəkkür etdiyini qeyd edib.
“Aleksandr Novak təsdiqlədi ki, Rusiya bizi ehtiyac duyduğumuz enerji təchizatı və maneəsiz tədarük üçün qanuni şərtlərlə təmin etməyə davam edəcək”, – Sijarto bildirib.
O əlavə edib ki, “Avropa – əsasən öz günahı üzündən – daimi enerji böhranları ilə üzləşir”. “Lakin belə qeyri-müəyyən şəraitdə də biz ölkəmizin enerji təchizatının təhlükəsizliyinə zəmanət veririk. Rusiya bunda əsas rol oynamalıdır – hətta siyasi səbəblərə görə deyil, coğrafi səbəblərə görə”, – nazir vurğulayıb.
Macarıstan neftinin böyük hissəsini hələ də Rusiyadan Drujba boru kəmərinin cənub qolu ilə, təbii qazı isə “Türk axını” boru kəməri və Bolqarıstan və Serbiya ərazisindən keçməklə alır. Bundan əlavə, Macarıstanın Paksdakı atom elektrik stansiyası Rusiya nüvə yanacağı ilə təmin edilir. (Tass)