İraq Nümayəndələr Şurasının (parlament) deputatları yeni spiker, qanunverici orqanın keçmiş rəhbəri Mahmud əl-Məşhədani seçiblər. Bu barədə İNA agentliyi məlumat yayıb.
Onun sözlərinə görə, oktyabrın 31-də keçirilən səsvermənin birinci turunda qalib müəyyən edilmədiyi üçün ikinci turun təşkili qərara alınıb. Yekun səsvermə zamanı əl-Məşhədani parlamentarilərdən 182 səs (qazanmaq üçün ona 166 səs lazım idi), onun əsas rəqibi Salem əl-İsavi isə 42 səs toplayıb. Daha 39 bülleten etibarsız sayılıb.
76 yaşlı Mahmud əl-Məşhədani bundan əvvəl 2006-2008-ci illərdə İraq parlamentinin sədri vəzifəsində çalışıb. O, ABŞ və müttəfiqlərinin 2003-cü ildə İraqı işğal etməsindən sonra ölkənin Nümayəndələr Şurasının ilk rəhbəri olub. (Tass)