Fransa prezidenti Emmanuel Makron Fələstin-İsrail nizamlanması məqsədilə siyasi prosesin bərpa olunmasının tərəfdarıdır. O, bu barədə Ramallahda Fələstin lideri Mahmud Abbasla iki saatlıq görüşdən sonra keçirilən mətbuat konfransında bildirib.
“Sülhün və təhlükəsizliyin bərpası üçün siyasi prosesin bərpası zəruridir”, – o deyib: “Davamlı sülh bərqərar olunmadan təhlükəsizlik axtarışları illüziya olaraq qalacaq. Bu, hər bir tərəfin qanuni istəklərinin tanınmasını nəzərdə tutur. Əminəm ki, dialoqun bərpası indi həmişəkindən daha çox lazımdır”.
Onun sözlərinə görə, “biz Fələstin əhalisinə ümid verməliyik və onların terrorçu qrupların illüziya çağırışlarına aldanmasının qarşısını almalıyıq”.
Makron bundan əvvəl İsrail prezidenti İsaak Hersoq və baş nazir Benyamin Netanyahu ilə danışıqlar aparıb. Çərşənbə günü o, Əmmanda İordaniya kralı II Abdulla və bir sıra digər regional liderlərlə görüşməyi planlaşdırır.