Fransa noyabrın 9-da Qəzza zolağında humanitar vəziyyətlə bağlı konfransa ev sahibliyi edəcək. Bunu Fransa prezidenti Emmanuel Makron deyib.
“Mən noyabrın 9-da Parisdə humanitar konfrans təşkil edəcəyəm” deyə Makron Fransanın qərbindəki Finistere departamentinə səfəri zamanı vurğulayıb.
Reuters-in diplomatlara istinadən verdiyi məlumata görə, konfrans dövlət, hökumət başçıları və xarici işlər nazirlərinin iştirakı ilə keçiriləcək. Misir, İordaniya və Körfəz ölkələri kimi regionun əsas ölkələri, eləcə də bir sıra Qərb ölkələri dəvət olunacaq. Agentlik xəbər verir ki, tədbirdə beynəlxalq təşkilatlar da iştirak edəcək. Mənbələr agentliyə Fələstin administrasiyasının dəvət olunduğunu, lakin İsrail tərəfinin dəvət olunmadığını bildirib. Reuters xəbər verir ki, konfransda Qəzza zolağına humanitar yardımın çatdırılması üçün dəniz dəhlizinin yaradılması imkanları müzakirə olunacaq. (Tass)