İranın xarici işlər naziri Abbas Əraqçi bildirib ki, ABŞ-ın hücumuna məruz qalan nüvə obyektlərinin təftişinə icazə almaq üçün Beynəlxalq Atom Enerjisi Agentliyi (MAQATE) Tehrana bu yoxlamaların dəqiq necə aparılacağını izah etməlidir.
İranın Tasnim xəbər agentliyi nazirin sözlərindən sitat gətirir: “Reallıq budur ki, müharibədən sonra İran və MAQATE arasında münasibətlərdə bəzi dəyişikliklər oldu və nəhayət, bizim nüvə obyektlərimizə hücum edildi və zədələndi. Agentlik hücuma məruz qalan obyektlərin təftişinin necə aparılacağını izah etməlidir ” . “Bizim MAQATE ilə mövqeyimiz ondan ibarətdir ki, [nüvə] obyektlərin təftişinə icazə verməzdən əvvəl onunla əməkdaşlıq üçün yeni çərçivə müəyyən edilməlidir”, – İran XİN rəhbəri qeyd edib.
İran rəsmiləri ilə MAQATE nümayəndəsi arasında avqustun 11-də Tehranda keçirilən danışıqlardan sonra İslam Respublikasının xarici işlər nazirinin müavini Kazım Qəribabadi bildirib ki, tərəflər İranın nüvə proqramı üzrə məsləhətləşmələri davam etdirmək barədə razılığa gəliblər. Diplomat qeyd edib ki, MAQATE baş direktorunun müavini Massimo Aparo ilə görüşdə hazırkı şəraitdə Tehranla agentlik arasında qarşılıqlı fəaliyyət formatı müzakirə olunub. Qəribabadi qeyd edib ki, İran tərəfi İsrail və ABŞ-ın İrana hücumu zamanı MAQATE-nin öz öhdəliklərini yerinə yetirməməsi ilə bağlı etirazını bildirib. (Tass)