Birləşmiş Ərəb Əmirliklərinin (BƏƏ) “Masdar” şirkətinin Azərbaycanda bərpa olunan enerji sahəsində həyata keçirdiyi layihələr ölkənin bərpa olunan enerji mənbələrindən (BOEM) alınan elektrik enerjisinə olan tələbatının 30 %-dən çoxunu təmin etməyə imkan verəcək.
“Report” xəbər verir ki, bu barədə “Masdar Azerbaijan” şirkətinin direktoru Murad Sadıxov “Daha “yaşıl” gələcəyə innovativ yollar: bərpa olunan enerji mənbələri və emissiyaların azaldılması” mövzusunda keçirilən tədbirdə bildirib.
“Hazırda iki günəş elektrik stansiyası inşa olunur – Biləsuvarda 445 MVt və Neftçalada 315 MVt gücündə. Biləsuvardakı stansiya bütün Xəzər regionunda bir ərazidə ən böyük generasiya obyekti olacaq”, – o qeyd edib.
Həmçinin cari ilin sonunadək 240 MVt gücündə külək elektrik stansiyasının tikintisinə başlanılması planlaşdırılır.
“Bu üç obyekt ümumi gücü 1 giqavat olan böyük “Mega” layihəsinin bir hissəsidir. Onların həyata keçirilməsi sayəsində “Masdar” Azərbaycanın enerji keçidinə əhəmiyyətli töhfə verəcək və bərpa olunan mənbələr hesabına elektrik enerjisinin cari istehlakının 30 %-dən çoxunu təmin edəcək”, – M. Sadıxov vurğulayıb.
Onun sözlərinə görə, layihənin həyata keçirilməsi Azərbaycan hökuməti, beynəlxalq tərəfdaşlarla sıx əməkdaşlıq, həmçinin Əbu-Dabi və BƏƏ hökumətinin dəstəyi sayəsində mümkün olub.
“Çağırışlara baxmayaraq, biz birlikdə bu iddialı layihə ilə irəliləməyi qərara almışıq”, – o əlavə edib.