MDB ölkələrinin diplomatik idarələrinin nümayəndələri Birliyin fəaliyyətinə informasiya təminatının səmərəliliyinin artırılması məsələlərini müzakirə ediblər. Bu barədə MDB İcraiyyə Komitəsində məlumat verilib.
Mətbuat xidmətindən verilən məlumata görə, dekabrın 3-4-də Birliyin mənzil-qərargahında “MDB-yə üzv dövlətlərin informasiya sahəsində qarşılıqlı fəaliyyətinə dair” mövzusunda Xarici İşlər nazirlikləri arasında məsləhətləşmələr keçirilib. Tədbir iştirakçıları “MDB fəaliyyətlərinin informasiya təminatının səmərəliliyinin artırılması məsələlərini”, Birlikdə yaddaqalan tarixləri və əlamətdar hadisələri müzakirə ediblər. Bundan əlavə, həmsöhbətlər MDB-də elan edilmiş Böyük Vətən Müharibəsində Qələbənin 80 illiyi ili – Nasizmə qarşı mübarizədə Sülh və Birlik İli çərçivəsində mümkün informasiya tədbirləri, eləcə də formalar barədə fikir mübadiləsi aparıblar.
Mətbuat xidmətindən verilən məlumata görə, görüşdə Rusiya tərəfi 2024-cü ildə Rusiya Federasiyasının MDB-də sədrliyi çərçivəsində tədbirlərə informasiya dəstəyinin təmin edilməsi istiqamətində görülən işlərdən danışıb.
İcraiyyə Komitəsi həmçinin bildirib ki, iclas iştirakçıları ümumi informasiya təhdidlərinə, o cümlədən dezinformasiyaya və saxta xəbərlərə qarşı mübarizədə səylərin əlaqələndirilməsinin vacibliyini qeyd ediblər. “Birgə monitorinq və təkzib mexanizminin yaradılması üçün ölkələr arasında qarşılıqlı fəaliyyətin qurulması zəruri hesab edilib”, – deyə mətbuat xidməti əlavə edib. (Tass)