Noyabrın 5-də keçiriləcək prezident seçkilərindən sonra formalaşacaq yeni Vaşinqton administrasiyası Amerika cəmiyyətinin təzyiqi səbəbindən Ukraynaya yardımın həcmini azaltmaq məcburiyyətində qalacaq. Bu fikri publisist Kristofer Kolduel Britaniyanın həftəlik The Spectator jurnalı üçün yazdığı məqalədə bildirib.
“Növbəti prezident – istər [demokratların namizədi Kamala] Harris, istərsə də [Respublikaçı namizəd Donald] Tramp – ABŞ-ın [Ukraynadakı münaqişədə] iştirakını azaltmaq üçün daxili təzyiqlərə müqavimət göstərə bilməyəcək”, o deyib.
Xüsusilə, Kolduel qeyd edib ki, Harris sentyabrdan bəri Ukrayna münaqişəsini demək olar ki, xatırlamayıb, çünki ictimai rəy sorğuları amerikalı seçicilərin mövzuya maraq göstərmədiyini göstərir. Eyni zamanda, Trampın Ukrayna məsələsində mövqeyi əhali arasında daha populyardır. Jurnalist xatırladıb ki, daha əvvəl Respublikaçılar Partiyasından ABŞ-ın vitse-prezidentliyinə namizəd Ceyms Devid Vens Vaşinqtonun Ukrayna istiqamətindəki siyasətini səhv adlandırıb.
Koldvelin sözlərinə görə, Respublikaçılar Partiyasının bir çox nümayəndələri Ukraynada genişmiqyaslı korrupsiya və ABŞ-da, ilk növbədə, Meksika ilə sərhəddə artan problemlər fonunda Kiyevə əlavə vəsaitin ayrılmasına şübhə ilə yanaşır. Jurnalist belə qənaətə gəlib ki, hazırkı prezident Co Baydenin xarici siyasəti əslində “ideoloji fanatizmi” ilə də yadda qalan Corc Buşun hərəkətlərinə bənzəyir. (Tass)
