Axios portalı mənbələrə istinadən iddia edir ki, Birləşmiş Ştatlar yaxın günlərdə İran və müttəfiqlərinin, o cümlədən Livanın şiə Hizbullah hərəkatının hücumunu dəf etmək üçün İsrailə kömək etməyə hazırlaşır.
Onların sözlərinə görə, ABŞ kəşfiyyatı iyulun 31-də İranın planlaşdırılan hücumu ilə bağlı xəbərlər almağa başlayıb. Bayden administrasiyası əmindir ki, İran HƏMAS Siyasi Bürosunun rəhbərinin Tehranda öldürülməsinə cavab olaraq yaxın bir neçə gün ərzində İsrailə hücum etmək niyyətindədir və İran buna görə İsrailin məsuliyyət daşıdığını bildirir. Mənbələrin məlumatına görə, Amerika rəsmiləri də bu hücumun İranın aprelin 13-də İsrailə zərbə endirərkən izlədiyi sxem üzrə həyata keçiriləcəyinə inanırlar.
Portal həmçinin iddia edir ki, Bayden administrasiyası Haniyənin öldürülməsindən sonra bölgədə anti-İsrail əhval-ruhiyyəsi səbəbindən aprel ayında İranın hücumunu dəf etməyə kömək edən müttəfiqləri səfərbər etməkdə çətinlik çəkə biləcəyindən ehtiyat edir.
Mənbələrin məlumatına görə, ABŞ-ın Fars körfəzi, Şərqi Aralıq dənizi və Qırmızı dənizdə yerləşən hərbi birləşmələri İranın zərbəsini dəf etmək üçün hazırlıqlarda iştirak edir. Portal xəbər verir ki, İsrail kəşfiyyatı İranın irimiqyaslı raket hücumu həyata keçirmək niyyətində olduğunu bildirib.