İsrailin Qəzza zolağının şimalı ilə həmsərhəd bölgəyə 400-ə yaxın texnika yerləşdirməsi quru əməliyyatının başlanmasına hazırlığın göstəricisidir. Bu barədə regionun peyk şəkillərini təhlil edən Nikkei Asia portalı məlumat yayıb.
Döyüş maşınlarının əksəriyyəti Qəzza zolağından 6-10 km aralıda yerləşir. Söhbət zirehli transportyorlardan, eləcə də digər zirehli texnika və hərbi maşınlardan gedir. Peyk şəkilləri oktyabrın 15-də Amerika operatoru Planet Labs tərəfindən çəkilib.
İsrailin ABŞ-dakı səfiri Maykl Herzoq bazar ertəsi CNN telekanalına açıqlamasında İsrailin “quru əməliyyata hazırlaşdığını” təsdiqləyib. New York Times daha əvvəl bildirmişdi ki, İsrailin Qəzza zolağında quru əməliyyatı ötən həftə sonu başlamalı idi, lakin buludlu hava səbəbindən İsrail pilotları və pilotsuz uçan aparat operatorlarının quru qüvvələrinə havadan dəstək vermək qabiliyyətinə maneçilik törədəcəyi üçün “bir neçə gün” təxirə salınıb. Yəhudi dövləti Qəzza şəhərini ələ keçirmək və Fələstin anklavının hazırkı hakimiyyətini devirmək üçün on minlərlə əsgər göndərməyi planlaşdırır. Nəşr qeyd edir ki, İsrailin 2006-cı il İsrail-Livan münaqişəsindən sonra həyata keçirdiyi ən böyük quru əməliyyatı ölkəni aylarca “2 milyondan çox əhalisi olan kiçik bir ərazidə” “qanlı şəhər döyüşlərinə” sürükləyə bilər. (Tass)