İfrat sağçı Otzma Yehudit (Yəhudi Gücü) partiyasına rəhbərlik edən İsrailin milli təhlükəsizlik naziri İtamar Ben-Qvir yenidən hakim koalisiyadan çıxmaqla hədələyib. Siyasətçi bu dəfə baş nazir Benyamin Netanyahunun Qəzza zolağında vəziyyətin mümkün tənzimlənməsi ilə bağlı danışıqlar üçün İsrail nümayəndələrini Dohaya göndərmək qərarından narazı qalıb.
“İsrail Hayom” qəzetinin məlumatına görə, o, iyulun 4-də axşam keçirilən və İsrail nümayəndə heyətinin Qətərə göndərilməsinə həsr olunmuş hərbi-siyasi kabinetin iclasında bunu birbaşa Netanyahuya bildirib. Nəşr siyasətçinin sözlərindən sitat gətirir: “Baş nazir, sizə deyirəm ki, təkbaşına qərarlar qəbul etsəniz, bunu öz təhlükəniz və riskinizlə edirsiniz, sonda tək qalacaqsınız”.
Ben-Qvir şikayət edib ki, Netanyahu, onun fikrincə, təhlükəsizlik orqanlarının rəhbərləri ilə qapalı görüşlərdə bütün mühüm qərarları qəbul edir. “Mən başa düşürəm ki, bizdən dərhal sonra real görüş olacaq. “, – nazir bildirib.
İsrail Hayom xəbər verir ki, bu zaman Kəşfiyyat Naziri Gila Gamliel (Likud partiyası) müzakirəyə girdi və Ben-Qvirdən onun sözlərinin təhdid sayıla biləcəyini soruşdu. “Heç bir təhdid yoxdur, bu, reallıqdır, əgər siz özünüz qərar qəbul edirsinizsə, o zaman məndən bu hökuməti saxlamağı gözləməməlisiniz”, – deyə Milli Təhlükəsizlik Naziri cavab verib. (Tass)