Ukrayna üzrə İsveçrə konfransı məyusedici oldu və onun iştirakçıları ciddi nəticələr əldə edə bilmədilər. Bu fikir Çinin “Global Times” qəzetində yer alıb.
“İsveçrədə Rusiyanın iştirakı olmadan keçirilən Ukrayna böhranı ilə bağlı iki günlük sülh konfransı məyusedici sona çatdı”, – deyə nəşr yazır: “Sülh konfransı heç bir mühüm irəliləyiş olmadan başa çatdı”.
Məqalədə qeyd olunur ki, Braziliya, Hindistan, Səudiyyə Ərəbistanı və Cənubi Afrika da daxil olmaqla əsas regional güclər forumdan sonra birgə kommünike imzalamayıblar. “Global Times” yazır ki, yekun sənəd qeyri-müəyyən olub, nüvə silahları, ərzaq təhlükəsizliyi və hərbi əsirlərin azad edilməsi kimi mövzulara toxunub, lakin münaqişənin necə və nə vaxt dayandırılacağı və Ukraynanın yenidən qurulması ilə bağlı əsas sualları buraxıb.
“Bu konfransın bir hissəsi kimi, Ukrayna və ABŞ-ın rəhbərlik etdiyi Qərb qruplaşması qlobal Cənub ölkələrinin diqqətini cəlb etmək üçün böyük səylər göstərdi, lakin onların planı uğursuz oldu”, materialda deyilir. (Tass)
