Tbilisidə müxalifət partiyalarının liderləri və onların tərəfdarları oktyabrın 26-da ölkədə keçirilən parlament seçkilərinin nəticələrinə qarşı yürüş keçirirlər. Bu barədə Gürcüstanın “TV Pirveli” telekanalı məlumat yayıb.
Onlar müxalifət partiyası Lelo-nun ofisinin yerləşdiyi paytaxtın dəmir yolu vağzalına toplaşıblar və oradan saat 19:00-da planlaşdırılan mitinqdə iştirak etmək üçün parlament binasının yerləşdiyi Rustaveli prospektinə keçiblər. Yürüş iştirakçıları əllərində Gürcüstanın və Aİ-nin bayraqlarını tutublar. Onlar ölkədə keçirilən seçkilərin saxtalaşdırıldığını və təkrar səsvermənin keçirilməsini tələb etdiyini iddia edirlər. (Tass)