Nigerin baş naziri Əli Lamine Zein müdafiə, neft, idman, ticarət və digər nazirlərin müşayiəti ilə İran, Rusiya, Serbiya və Türkiyəyə səfər etmək üçün bazar ertəsi günü səfərə çıxıb. Bu barədə Mondafrique hökumətdəki mənbəyə istinadən məlumat yayıb.
Qeyd edilib ki, Nigerin yeni hakimiyyət orqanları müdafiə, kənd təsərrüfatı, energetika sahələrində tərəfdaşlığı şaxələndirmək, həmçinin neft və tibbi avadanlıq ticarəti sahəsində əlaqələri inkişaf etdirmək niyyətindədir.
2023-cü ilin iyul ayının sonunda Niger Prezident Qvardiyasının bir qrup əsgəri qiyam qaldıraraq prezident Məhəmməd Bazumun hakimiyyətdən uzaqlaşdırıldığını elan etdi. Ölkəni idarə etmək üçün qvardiya komandiri Əbdürrəhman Çianinin başçılığı ilə Vətənin Qurtuluşu Milli Şurası yaradıldı. Qərbi Afrika Dövlətlərinin İqtisadi Birliyinin (ECOWAS) liderləri üsyançılara qarşı sərt sanksiyalar tətbiq edərək, güc tətbiq etməklə hədələyərək Bazumu azad etməyi tələb ediblər. (Tass)