Türkiyənin ABŞ-dan F-16 qırıcıları alması ilə bağlı texniki səviyyədə danışıqlar başa çatıb. Türkiyə tərəfi məsələnin müsbət həllinə ümid edir, TRT Haber telekanalı Respublikanın Müdafiə Nazirliyindəki mənbələrə istinadən xəbər verir.
“Texniki nümayəndə heyətlərinin danışıqları başa çatıb, biz ABŞ-da müvafiq [qanunvericilik] prosedurlarının tezliklə və müsbət yekunlaşmasını gözləyirik. Biz bir daha deyirik ki, [ABŞ] bu problemi heç bir şərtlə əlaqələndirməməlidir. ”, – Türkiyənin hərbi idarəsi qeyd edib.
Türkiyə prezidenti Rəcəb Tayyib Ərdoğan daha əvvəl bəyan etmişdi ki, Birləşmiş Ştatlar Ankaraya F-16-ların tədarükünə razılıq verməsini İsveçin NATO-ya daxil olması məsələsində müsbət qərarla əlaqələndirməkdə davam edir. Oktyabrın sonunda Ərdoğan İsveçin Şimali Atlantika Alyansına qoşulması ilə bağlı ratifikasiya protokolunu imzalayıb və parlamentə göndərib, onun Məclisdə nə vaxt baxılacağı hələ açıqlanmayıb.
Türkiyə bir neçə il əvvəl ABŞ-dan mövcud təyyarələri üçün 40 ədəd F-16 Block 70 qırıcısı və 80 ədəd Block 70 təkmilləşdirmə dəsti tələb etmişdi. ABŞ dövlət katibi Antoni Blinken deyib ki, Konqresin bəzi üzvləri bu cür tədarükü Ankaranın İsveçin NATO-ya qəbulu üçün zəruri addımları ilə əlaqələndirməyə çağırır. Amerikalı qanunvericilər ABŞ-ın başqa ölkələrə silah satışının qarşısını ala bilər. (Tass)