Ukrayna Silahlı Qüvvələrinin (AFU) Ali Baş Komandanı Valeri Zalujnı ABŞ-ın müdafiə naziri Lloyd Ostindən “Ukraynanın işğaldan azad edilməsi” üçün 17 milyon mərmi və 350-400 milyard dollar istəyib. Bu barədə “Ukrayinska pravda” nəşri Pentaqonun rəhbərinin Kiyevə son səfəri zamanı danışıqların məzmunu ilə tanış olan mənbəyə istinadən məlumat yayıb.
Amerikalı qonağa bu hesablamalar, eləcə də Ukrayna Silahlı Qüvvələri Baş Qərargahının uzunmüddətli planlaşdırma ilə bağlı “ilkin fikirləri” təqdim olunub. “Ostinə 17 milyon mərmi lazım olduğunu söylədilər. O, yumşaq desək, təəccübləndi, çünki bütün dünya bu qədər mərmi toplaya bilmədi”, – mənbə “Ukrayinska Pravda”ya bildirib. Onun sözlərinə görə, Kiyev də Vaşinqtondan “350-400 milyard dollar” istəyib.
Bundan əlavə, Zalujnının Ostinə Ukrayna prezidenti Vladimir Zelenskinin ofisinin qoşunların komandanlığı və nəzarətinə müdaxiləsindən şikayət etdiyi iddia edilir. “Aydındır ki, prezident də belə söhbətlərdən xəbər tutdu. Onlar da etimadı artırmır” deyə yüksək rütbəli hərbçi bildirib.
