Dekabrın 10-da AMEA-nın Memarlıq və İncəsənət İnstitutunda Ulu Öndər Heydər Əliyevin xatirəsinə həsr olunmuş anım tədbiri keçirilib.
Bu barədə AZƏRTAC-a AMEA-dan məlumat verilib.
Tədbiri açan institutun ümumi işlər üzrə direktor müavini dosent Namiq Abbasov Ulu Öndər Heydər Əliyev ilə xalqın birliyindən danışıb, bu birliyin dövlətin inkişafı, siyasi mədəniyyətin və demokratiyanın güclənməsində önəmli rol oynadığını qeyd edib.
Tədbirdə institutun elmi işlər üzrə direktor müavini sənətşünaslıq dosent Xəzər Zeynalovun “Heydər Əliyevin Azərbaycan rəssamları ilə görüşü”, Şəhərsalma şöbəsinin müdiri dosent Samirə Abdullayevanın “Azərbaycan memarlığının inkişafında Heydər Əliyevin rolu” mövzusunda məruzələri dinlənilib.
Sonda institutun direktoru AMEA-nın müxbir üzvü Ərtegin Salamzadə Ümummilli Lider Heydər Əliyevin müstəqil Azərbaycanın quruculuğu və inkişafı istiqamətindəki xidmətlərindən ətraflı bəhs edib. O, müdrikliyi, uzaqgörənliyi, qətiyyəti, mükəmməl bilik və bacarığı ilə Heydər Əliyevin mədəniyyət və incəsənət sahəsində də silinməz izlər qoyduğunu vurğulayıb.