Almaniyanın keçmiş kansleri Angela Merkel (2005-2021-ci illərdə vəzifədə idi) Almaniyanın hazırkı hökumətinin qeyri-qanuni miqrasiya ilə mübarizə, xüsusən də sərhəd nəzarətinin gücləndirilməsi ilə bağlı gördüyü tədbirlərdən danışıb.
Merkel Südwest Presse qəzetinin Neu-Ulm şəhərində təşkil etdiyi forumda deyib: “Almaniya-Avstriya və ya Almaniya-Polşa sərhədində qanunsuz miqrasiyaya nəhayət qalib gələ biləcəyimizi düşünmürəm”. Onun sözlərini Der Spiegel jurnalı sitat gətirir. Keçmiş kansler qeyd edib ki, “mən həmişə Avropa həllərinə arxalanmışam”.
Onun fikrincə, ayrı-ayrı ölkələrin birtərəfli addımları Avropanın hərəkət azadlığı bahasına başa gələ bilər. Merkel Aİ-də qeyri-qanuni miqrasiya ilə mübarizə yollarını birgə axtarmağa çağırıb. “Çünki əks halda biz Avropanın parçalanmasını seyr etməli ola bilərik” deyə xəbərdarlıq edib. (Tass)