Almaniyanın ehtimal olunan gələcək kansleri Fridrix Merz ABŞ prezidenti Donald Trampa “Almaniya doğru yola qayıtdı” siqnalını verməyə hazır olduğunu açıqlayıb.
“Almaniya müdafiə sahəsində üzərinə düşən öhdəlikləri yerinə yetirəcək. Almaniya isə öz rəqabət qabiliyyətini gücləndirməyə hazırdır”, – deyə Merz Berlində jurnalistlərin məsələ ilə bağlı sualını cavablandırıb. “Bu, təkcə Almaniyaya aid deyil. Avropa İttifaqı və Almaniya yenə də çox güclü tərəfdaş olacaq”, – o vurğulayıb.
Çərşənbə günü səhər saatlarında Xristian Demokrat İttifaqı və Xristian Sosial Birliyinin (CDU/CSU) mühafizəkar bloku və Almaniya Sosial Demokrat Partiyası (SPD) Almaniyanın yeni hökumətinin işinin əsasını təşkil edəcək koalisiya sazişi hazırlayıblar. Müqavilənin mətnində Almaniyanın gələcək hakimiyyət orqanlarının ABŞ-la münasibətlərə “böyük əhəmiyyət verdiyi” və Almaniyanın ümumi təhlükəsizliyin təmin edilməsi məsələlərində daha çox məsuliyyət daşımağa hazır olduğu vurğulanır.