Noyabrın 7-də Azərbaycan Milli Kitabxanasında “44 günün Şanlı Zəfəri” adlı ənənəvi kitab sərgisinin açılışı və Rəfiqə Sadıqovanın “Talesizlər şəhəri” kitabının təqdimat mərasimi keçirilib.
AZƏRTAC xəbər verir ki, əvvəlcə Azərbaycan Respublikasının Dövlət Himni səsləndirilib. Daha sonra Azərbaycanın ərazi bütövlüyü və müstəqilliyi uğrunda şəhid olan qəhrəmanlarımızın xatirəsi bir dəqiqəlik sükutla yad edilib.
Tədbiri giriş sözü ilə açan Azərbaycan Milli Kitabxanasının direktoru Kərim Tahirov tarixi Zəfərimizin üç illiyi münasibətilə təsis edilən “44 günün Şanlı Zəfəri” adlı kitab sərgisi barədə ətraflı məlumat verib.
8 Noyabr – Zəfər Gününü Ali Baş Komandanın rəhbərliyi ilə rəşadətli Azərbaycan Ordusunun tariximizin səhifələrinə qızıl hərflərlə yazdığını bildirib.
Daha sonra Rəfiqə Sadıqovanın “Talesizlər şəhəri” kitabının təqdimat mərasimi olub.
Kitabda müharibənin acı səhnələrinin əks olunduğu bildirilib, bu qəhrəmanlıqların unudulmaması üçün həmin mövzuda yazılan kitabların geniş təbliğinin vacibliyi və Milli Kitabxananın bu sahədəki rolu diqqətə çatdırılıb.
Daha sonra Milli Məclisin deputatı, yazıçı, publisist Aqil Abbas Vətən müharibəsində qazanılan tarixi Qələbədən qürur hissi duyduğunu və hadisələrin müəllif tərəfindən böyük məharətlə qələmə alındığını qeyd edib.
Milli Məclisin deputatı, “Azərbaycan” qəzetinin baş redaktoru Bəxtiyar Sadıqov qeyd edib ki, sözügedən kitabda Azərbaycan xalqının mənəviyyatının tərənnümü əks olunub.
Sonda qonaqlar kitab sərgisi ilə tanış olublar.