Fevralın 12-də Milli Məclis sədrinin müavini, parlamentin Gənclər və idman komitəsinin sədri Adil Əliyev parlamentdə növbəti dəfə şəhid ailələri, qazilər, habelə müraciət edən seciçiləri ilə görüşüb.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildiriblər, görüşdə vətəndaşlar tərəfindən qaldırılmış müxtəlif məzmunlu sosial, humanitar, təhsil kimi məsələlərin bir qismi yerindəcə həll olunub. Digər məsələlərin həlli məqsədilə mərkəzi və yerli icra hakimiyyəti orqanlarına aidiyyəti üzrə məktublar göndərilib, araşdırılması vaxt tələb edən müraciətlərin hər biri nəzarətə götürülməklə, onların da həlli istiqamətində müvafiq addımlar atılır.
Görüşdə vətəndaşlara mövcud qanunvericiliyin tələblərinə dair hüquqi izahlar da verilib. Adil Əliyev ünvanına daxil olan vətəndaş müraciətlərinin hər birinin həlli məqsədilə qanunvericiliyin tələblərinə uyğun olaraq aidiyyəti üzrə bütün addımlar atıldığını diqqətə çatdırıb.
Vətəndaşlar Prezident, Müzəffər Ali Baş Komandan İlham Əliyevin seçicilərin mütləq əksəriyyətinin səsini qazanaraq yenidən dövlət başçısı seçilməsindən məmnunluqlarını ifadə edib, sevinclərini bölüşüblər.
