Qahirədə 51-ci Ümumərəb Əmək Konfransı keçirilir. Aprelin 26-dək davam edəcək tədbirdə 21 ərəb ölkəsindən nazirlər, hökumət üzvləri, sahibkarlar və əmək təşkilatlarının rəhbərləri, o cümlədən mərkəzi qərargahı Bakıda yerləşən İslam Əməkdaşlıq Təşkilatının Əmək Mərkəzinin nümayəndə heyəti iştirak edir.
AZƏRTAC xəbər verir ki, Misirin əmək naziri Məhəmməd Cubran və Əmək Mərkəzi Katibliyinin Baş direktoru Azər Bayramov arasında keçirilən görüşdə tərəflər arasında sosial müdafiə, insan kapitalının inkişafı və əmək məsələləri sahələrində əməkdaşlıq imkanları müzakirə olunub. Misirin Əmək Nazirliyinin Əmək Mərkəzinə üzvlüyü məsələsi barədə fikir mübadiləsi aparılıb.
Öz növbəsində, nazir Məhəmməd Cubran rəhbərlik etdiyi qurumun fəaliyyəti, işçilərin sosial rifahının yaxşılaşdırılması, istehsal tərəfləri arasında əlaqənin möhkəmləndirilməsi, yaşıl iqtisadiyyata keçid, təmiz enerji sahələrində görülmüş işlər barədə məlumat verib. Azərbaycanı mərkəzi qərargahı Qahirədə yerləşən İƏT-in Qadın İnkişaf Təşkilatının nizamnaməsinə qoşulmağa çağırıb.
Eyni zamanda, Azər Bayramov Misir tərəfini İƏT-in Əmək Mərkəzinin Qətərdə keçirilməsi planlaşdırılan Baş Assambleyasında iştirak etməyə dəvət edib.