Misir İsrailin Fələstin ərazilərindəki hərəkətləri ilə bağlı Beynəlxalq Ədalət Məhkəməsinə nota göndərməyi planlaşdırır. Bu barədə “Əl-Qahirə əl-İxbariyyə” telekanalı Misir rəsmisinə istinadən məlumat yayıb.
Onun sözlərinə görə, hakimiyyət fevralın 21-də məhkəməyə nota təqdim edəcək. Bundan əlavə, Misir BMT Baş Assambleyasının Beynəlxalq Ədalət Məhkəməsindən tələb etdiyi 1967-ci ildən İsrailin Fələstin ərazilərindəki hərəkətləri ilə bağlı məsləhətçi rəyin hazırlanmasında iştirak edəcək, rəsmi bildirib.
Cənubi Afrika 29 dekabr 2023-cü ildə Haaqa Beynəlxalq Ədalət Məhkəməsində İsrailə qarşı iddia qaldırıb. Cənubi Afrika tərəfi məhkəmədən “Fələstin əhalisini soyqırım konvensiyasına uyğun olaraq hüquqlarının daha ciddi və düzəlməz şəkildə pozulmasından qorumaq” və İsrailin konvensiya üzrə öhdəliklərinə əməl etməsini təmin etmək üçün qabaqlayıcı tədbirlərin görülməsini xahiş edib.
Beynəlxalq Ədalət Məhkəməsi Cənubi Afrikadan gələn iddianın ardınca yanvarın 26-da İsrailin Qəzzada soyqırımın qarşısını almaq üçün bütün lazımi tədbirləri görməsinə qərar verib. Cənubi Afrikanın İsrailə qarşı iddiasının mahiyyətinin məhkəmədə bir neçə il çəkəcəyi gözlənilir. (Tass)