Müasir texnologiyalar təhsil sistemində həm yeni imkanlar açır, həm də müəyyən risklər yaradır.
Bu barədə AZƏRTAC-a açıqlamasında Milli Məclisin deputatı, ADA Universitetinin prorektoru, İnkişaf və Diplomatiya İnstitutunun direktoru Fariz İsmayılzadə deyib. O bildirib ki, son 20 ildə internetin və rəqəmsal texnologiyaların inkişafı təhsil sahəsində ciddi transformasiyaya səbəb olub. Onun sözlərinə görə, onlayn təhsil imkanlarının genişlənməsi tədrisə çıxışı asanlaşdırıb, eyni zamanda, təhsilin idarə olunmasını daha çevik və effektiv edib.
Bununla yanaşı, prorektor qeyd edib ki, yeni texnologiyalar müəyyən çağırışlar da yaradır: “Tələbələr daha çox sosial şəbəkələrdə vaxt keçirir, süni intellekt alətlərindən geniş istifadə edirlər. Bu isə onların müstəqil yazı və düşünmə bacarıqlarına təsir göstərə bilər. Texnologiyalar yalnız alət kimi qiymətləndirilməlidir və onların düzgün istifadəsi vacibdir. Onun fikrincə, təhsil prosesində süni intellektdən istifadə mümkün olsa da, bu, insani keyfiyyətləri əvəz etməməlidir.
Fariz İsmayılzadə əlavə edib ki, gələcək nəsillərdə milli dəyərlər, komanda işi, kommunikasiya, çətinliklərə davamlılıq və problemlərin həlli kimi bacarıqların inkişafı xüsusi əhəmiyyət daşıyır.