Sual doğurur: “Niyə Ermənistan sülhdə maraqlı deyil”. Düşünürəm ki, bu ölkə siyasi konyunkturanın dəyişməsini gözləyir. Ermənistan sülhdə maraqlı deyilsə, bu məsələni zamana buraxmaq lazımdır.
Prezident İlham Əliyevin vurğuladığı kimi, qəbul edilən qərarlar, imzalanan sənədlər xalqımızın və dövlətimizin maraqlarına uyğun olmalıdır.
AZƏRTAC xəbər verir ki, bu fikirləri “Cənubi Qafqazda sülh və əməkdaşlıq perspektivləri” mövzusunda keçirilən tədbirdə Milli Məclisin deputatı, tarix elmləri doktoru, professor Musa Qasımlı səsləndirib.
Azərbaycan-Ermənistan münasibətlərinin region çərçivəsindən daha geniş spektrdə olan bir məsələ olduğunu qeyd edən professor deyib: “Ermənistan bizimlə münasibətlərin normallaşmasında, delimitasiya və demarkasiya məsələlərinin həll olunmasında maraqlı deyilsə, onun niyyətinin nə olduğu maraq doğurur.
Biz Qərbdən və dünyadan təcrid olunmamışıq. Azərbaycan hər zaman konkret və preventiv siyasət yürüdür və bundan sonra da yürüdəcək”.