Son illər Azərbaycanda möhtəşəm musiqi festivalları keçirilir. Belə tədbirlərin keçirilməsi dövlətimizin, şəxsən Prezident İlham Əliyevin, Birinci vitse-prezident Mehriban Əliyevanın incəsənətə olan qayğısının, diqqətinin bariz nümunəsidir. Bu festivallar içərisində Şəki “İpək Yolu” Beynəlxalq Musiqi Festivalı xüsusi yer alıb.
Bu sözləri AZƏRTAC-ın bölgə müxbirinə müsahibəsində Şəki “İpək Yolu” XIV Beynəlxalq Musiqi Festivalında iştirak edən Əməkdar mədəniyyət işçisi, sənətşünaslıq üzrə fəlsəfə doktoru Səadət Təhmirazqızı deyib.
Festival başlandığı vaxtdan, yəni 2009-cu ildən indiyədək bu möhtəşəm musiqi bayramında dünyanın 35-dən çox ölkəsinin musiqiçilərinin iştirak etdiyini diqqətə çatdıran musiqişünas deyib: “Baxın, o qədər musiqiçinin Azərbaycana, Şəkiyə gəlməsi və bizim musiqiçilərlə bir səhnəni bölüşməsi sanki Azərbaycanla xarici ölkələr arasında bir mənəvi körpü yaradır. Bu mənada festivalın çox böyük əhəmiyyəti var. “İpək Yolu” Beynəlxalq Musiqi Festivalı insanlarda böyük maraq yaradıb”.
Səadət Təhmirazqızı bildirib ki, gündən-günə inkişaf edən Azərbaycanda belə festivalların keçirilməsi çox gözəl haldır. “Bütün musiqiçilərimizə yaradıcılıqlarında uğurlar arzulayır, Azərbaycan tamaşaçısına isə daim gözəl musiqidən zövq almağı diləyirəm”, – deyə o əlavə edib.