Amerikanın SpaceX şirkətinin Starship prototipinin onuncu sınaq uçuşu təxminən üç həftədən sonra baş tutacaq. Bu barədə şirkətin rəhbəri İlon Mask məlumat verib.
“Yeni buraxılış təxminən üç həftə ərzində baş tutacaq” deyə X-də yazıb.
Əvvəlki Starship buraxılışı may ayının sonlarında baş tutdu və prototipin buraxılışdan yarım saat sonra itirilməsi ilə başa çatdı.
Martın 15-də Mask 2026-cı ilin sonunda insanabənzər robot Optimus ilə Marsa “Starship” gəmisini göndərəcəyini açıqladı. Onun sözlərinə görə, robotla Marsa uçuşlar uğurlu olarsa, o zaman 2029-cu ildə insanlarla gəmilər göndərilə bilər. Sahibkarın qarşısına qoyduğu əsas məqsəd 20 il ərzində Marsda özünü təmin edən şəhər yaratmaqdır.
Tərtibatçının planlarına əsasən, “Starship” kosmik sistemi universal olacaq və Yerə yaxın orbitə pilotlu uçuşlar, peyklərin buraxılması və Aya və Marsa, eləcə də daha uzaq səma cisimlərinə missiyaların yerinə yetirilməsi üçün müxtəlif versiyalarda istifadə oluna biləcək. Yenidən istifadə edilə bilən Super Heavy və Starship gəmisinin Yerə şaquli eniş edəcəyi nəzərdə tutulur. Hazırkı layihəyə əsasən, kosmik sistemin ümumi hündürlüyü 121 m (o cümlədən gəmi – 50 m, sürətləndirici – 71 m), diametri 9 m, yükgötürmə qabiliyyəti 100-150 tondur.