Bakıdakı Rus Evinin kinoklubunda “Bremen musiqiçiləri” və “Bremen musiqiçilərinin izi ilə” cizgi filmləri nümayiş olunub. Tədbir SSRİ Xalq artisti, milli səhnə əfsanəsi, kinoaktyor və bəstəkar Müslim Maqomayevin oktyabrın 25-də qeyd edilən xatirə gününə həsr olunub.
Rusiya İnformasiya-Mədəniyyət Mərkəzinin (RİMM) mətbuat xidmətindən AZƏRTAC-a bildirilib ki, tədbirdə “Doşkolyonok” və “Poçemuçka” məktəbəqədər hazırlıq qruplarının şagirdləri iştirak ediblər.
Bu il Müslim Maqomayevin də çəkilişlərində iştirak etdiyi “Bremen musiqiçilərinin izi ilə” kult cizgi filminin ekranlara çıxmasının 50 ili tamam olur. 1973-cü ildə bu cizgi filminin səs aktyorluğu işi üzərində çalışan dahi artist özünü çox gözəl musiqi parodiyaçısı rolunda göstərə bilib. O, yalnız baş qəhrəman Trubaduru deyil, həm də bir neçə başqa personajları, o cümlədən quldurların başçısı Atamanşa və Kralın işə götürdüyü Xəfiyyəni səsləndirib. Gennadi Qladkovun musiqisinə Yuri Entinin uşaqlar üçün lirik şeirlər yazdığı Trubadurun məşhur serenadası isə, şübhəsiz ki, Maqomayevin yaradıcılığında ən sevilən və tanınan kompozisiyalardan biri olub.