“Report” xəbər verir ki, bunu Dövlət Məşğulluq Agentliyinin İdarə Heyətinin sədri Mustafa Abbasbəyli “Təhsilin İnkişafı Forumu 2023″də çıxışı zamanı deyib.

Onun sözlərinə görə, bu gün peşələrin gələcəyi ilə bağlı müzakirələr aparılır: “Bu isə dövlət olaraq bizim qarşımızda məsuliyyət qoyur. Yeni peşələr yaranacaq, insanlar peşələrini dəyişəcək. Bu gün ənənəvi peşələrə sahib şəxslərin peşələrini itirmək ehtimalı var. Biz yeni yanaşmalara ayaq uydurmalıyıq”.

M.Abbasbəyli qeyd edib ki, bu gün təhsil və sənayenin qarşılıqlı əlaqəsi müzakirə edilir: “Bu gün əmək bazarı sifarişçi, təhsil sistemi isə istehsalçıdır. Əmək bazarının açarı təhsilin əlindədir. Ona görə də yeniliklər etməliyik. Biz hadisələri qabaqlamalıyıq, amma geridə qalırıq. Bu gün data analitiklərin yetişdirilməsindən bəhs edirik, hazırda bu sahəyə tələb var. Lakin biz bilmirik ki, 4 ildən sonra bu sahəyə tələb olacaqmı? Biz əmək bazarının bizdən nə istədiyini bilməliyik, amma biz hazırda əmək bazarının bizdən nə istədiyini bilmirik”.