“Report” xəbər verir ki, bunu Azərbaycanın ekologiya və təbii sərvətlər naziri, COP29-un prezidenti Muxtar Babayev Bakıda Qoşulmama Hərəkatının Gənclər Təşkilatının təşkilatçılığı ilə iqlim fəaliyyətinə dair forumda çıxışı zamanı deyib.

“COP29-da biz ölkəmizin Qoşulmama Hərəkatına sədrliyi zamanı əldə etdiyimiz təcrübədən uğurla istifadə edə bilərik. Azərbaycan çalışır ki, bütün ölkələr qarşılıqlı maraq doğuran məsələlərlə bağlı dəstəklərini ifadə etsinlər. Bütün tərəfləri iqlim dəyişikliyi ilə mübarizə üzrə beynəlxalq öhdəliklərə əməl etməyə çağırsınlar”, – o bildirib.

M.Babayev qeyd edib ki, 2023-cü ildə pandemiyadan sonrakı bərpaya həsr olunmuş sammit keçirilib: “COVID-19 ilə iqlim dəyişikliyinə qarşı kollektiv mübarizəmiz arasında paralellər əhəmiyyətlidir. Bu, bizə ümumi problemi həll etmək və s. üçün bütün dünya səylərini birləşdirməyin vacibliyini göstərib”.

Onun sözlərinə görə, gənclər qlobal liderlərin gələcək nəsli kimi qlobal problemlərin həlli üçün lazım olan bilikləri bölüşmək və ümumi bacarıqları inkişaf etdirmək üçün bir araya gələ bilərlər: “Bu ilin noyabrında dünya illik iqlim ilə bağlı danışıqları yekunlaşdırmaq üçün Bakıda toplaşacaq. COP29-un məqsədi inklüziv nəticələrə nail olmaqdır. Odur ki, builki danışıqlarda iqlim dəyişikliyindən ən çox təsirlənəcək gənc nəsillərin səsi mütləq eşidilməlidir”