Vətəndaşların Sosial Rifahı Naminə İctimai Birliyi 2023-2024-cü illərdə Qərbi Azərbaycanla bağlı iki layihə icra edib.
Bunu “Qərbi Azərbaycana qayıdış istiqaməti üzrə icra edilən layihələr”ə dair brifinq çərçivəsində “Report”a açıqlamasında İctimai Birliyin sədri Nədimə Rəhimli deyib.
O bildirib ki, 2023-cü ildə Qərbi Azərbaycanın tarixi abidələri və mədəni irsi mövzusunda fotosərgi təşkil olunub:
“Layihə çərçivəsində “İrəvan – tariximiz, torpağımız, taleyimiz” adlı kitab (fotoalbom) hazırlanıb. “Qərbi Azərbaycanın tarixi abidələri və mədəni irsi” mövzusunda sərginin açılış mərasimi və “İrəvan – tariximiz, torpağımız, taleyimiz” adlı fotoalbomun təqdimatı keçirilib. Sərgidə Qərbi Azərbaycan – qədim İrəvanın tarixi abidələri, mədəniyyəti, təhsili, nəşriyyatı, tarixi şəxslərini özündə ehtiva edən 300-ə yaxın fotoşəkil və rəsmlər yer alıb. Onların hamısı 3 dildə – Azərbaycan, rus, ingilis dillərində izahlı şəkildə təqdim edilib. Bundan əlavə, Qərbi Azərbaycana xas olan geyimlər, xalçalar, musiqi alətləri, tarixi sənədlər, qədim dövrə aid əşyalar nümayiş olunub”.
N.Rəhimli qeyd edib ki, sözügedən kitabda yer alan fotoşəkillərin, demək olar ki, hamısı xarici – alman, rus, ingilis, hollandəsilli rəssam səyyahların kolleksiyalarından ibarətdir: “Burada hətta erməniəsilli rəssamın İrəvan şəhərinin mərkəzindəki məscidi təsvir edən rəsm əsərləri belə mövcuddur”.