Nərimanov rayonunda yaşayan Qərbi Azərbaycan əsilli şəhid ailələrinin iştirakı ilə görüş keçirilib.AZƏRTAC xəbər verir ki, tədbir ölkəmizin ərazi bütövlüyü uğrunda mübarizədə şəhid olan övladların xatirəsinin bir dəqiqəlik sükutla yad edilməsi ilə başlayıb.Tədbirin İcmanın Nərimanov təşkilatının təşəbbüsü ilə keçirildiyini deyən Qərbi Azərbaycan İcması sədri, VI çağırış Milli Məclisin deputatı Əziz Ələkbərli Prezident İlham Əliyevin və Birinci vitse-prezident Mehriban Əliyevanın hər zaman şəhid ailələrini, müharibə əlillərini və müharibə iştirakçılarını diqqətdə saxladığını, göstərilən diqqət və qayğı sayəsində bu təbəqədən olan şəxslərin, onların ailələrinin sosial vəziyyətinin yüksəldiyini bildirib. Mənfur ermənilərin Qərbi Azərbaycandan – öz yurd-yuvasından didərgin saldıqları insanların Azərbaycanın ərazi bütövlüyünün qorunmasında iştirakını, habelə göstərdikləri qəhrəmanlıqların dövlətimiz tərəfindən yüksək qiymətləndirildiyini qeyd edən icma sədri Vətənimizin müdafiəsi uğrunda mübarizədə canlarını fəda etmiş övladları unutmayacaqlarını vurğulayıb.Respublika Ağsaqqallar Şurasının üzvü Vahid Novruzov, Ağsaqqallar Şurası Nərimanov təşkilatının sədri, Vətən Müharibəsi Qəhrəmanı, şəhid Azad Hümbətovun atası Arif Hümbətov, Vətən Müharibəsi Qəhrəmanı, şəhid Zaur Nudrəliyevin həyat yoldaşı Nazilə Nudrəliyevə və digər natiqlər çıxışlarında ölkəmizdə şəhid və qazi ailələrinə göstərilən qayğı, diqqətə görə ölkə rəhbərliyinə minnətdarlıqlarını bildiriblər.Qərbi Azərbaycan İcması Nərimanov təşkilatının sədri Təmraz Tağıyev çıxışında Ali Baş Komandan İlham Əliyevin və müzəffər Ordumuzun qəhrəmanlığı sayəsində Qarabağımıza qayıtdığımız kimi, hər bir Qərbi azərbaycanlının doğma torpaqlara qayıdacağı günü səbirsizliklə gözlədiyini deyib. Vurğulayıb ki, icmada təmsil olunan şəhid və qazi ailələri onlara göstərdiyi qayğı və diqqətdən razılıqlarını bildirirlər.Sonda iştirakçılara icmanın üzvlük vəsiqələri təqdim olunub.Tədbirdə şəhid ailələri və Qərbi Azərbaycan İcması Nərimanov təşkilatının üzvləri iştirak ediblər.