AMEA Memarlıq və İncəsənət İnstitutunun Memarlıq abidələrinin qorunması və bərpası problemləri şöbəsinin müdiri, memarlıq doktoru, dosent Rahibə Əliyevanın “Nardaran Dövlət Tarix-Mədəniyyət Qoruğu” monoqrafiyası nəşr edilib.
Bu barədə AZƏRTAC-a institutdan məlumat verilib.
Tarix və mədəniyyət üçün böyük əhəmiyyət kəsb edən xüsusi ərazilər, mədəniyyət abidələri gələcək nəsillərə ötürülməsi məqsədilə mühafizə olunur. Qoruqlar funksionallıq baxımından tarixi-memarlıq, tarixi-arxeoloji, tarixi-mədəniyyət, tarixi-etnoqrafik qoruqlar kimi təsniflənir. Qoruqların memarlıq məktəbinə xas ümumi memarlıq-şəhərsalma prinsiplərinə baxmayaraq, coğrafi mövqe, hərbi, dini, mülki tikililərin özünəməxsusluğu onları bir-birindən fərqləndirir. Abşeron rayonunda qeydə alınan altı tarixi-mədəniyyət qoruqlarından biri də Nardaran Dövlət Tarix-Mədəniyyət Qoruğudur. Abşeronun tarixi kəndlərindən olan Nardaran Azərbaycan Respublikası Nazirlər Kabinetinin qərarına əsasən Bakı şəhərinin Sabunçu rayonunda “Nardaran Dövlət Tarix-Mədəniyyət Qoruğu” elan edilib.
Tarixi-memarlıq irsinə malik Nardaran qoruğu turizm mədəniyyətinin inkişafında da əhəmiyyətli rola malikdir. Memarlıq doktoru Rahibə Əliyeva institutun bir neçə elmi əməkdaşı ilə birgə ərazidə tədqiqatlar aparıb. “Nardaran Dövlət Tarix-Mədəniyyət Qoruğu” monoqrafiyası bu tədqiqatların nəticəsində ərsəyə gəlib. Qoruğun tədqiqi göstərir ki, Abşeron memarlığının nadir tikililəri kimi Nardaran abidələri maraqlı və qiymətli memarlıq xüsusiyyətləri və inşaat üsullarının üzə çıxarılması nöqteyi-nəzərindən böyük əhəmiyyət kəsb edir.
Kitabda Nardaran kəndinin hərbi, dini, mülki tikililərinin təsnifatı işlənib, onların bərpa təklifləri hazırlanıb. Yeni abidələr siyahıya alınıb.