NATO-nun keçmiş baş katibi (1999-2003) Corc Robertson hesab edir ki, hərbi xərclərin ÜDM-in 5%-nə qədər artırılması alyansın bəzi Avropa üzv dövlətləri, o cümlədən Böyük Britaniya üçün ağrılı proses olacaq.
1997-1999-cu illərdə Böyük Britaniyanın müdafiə naziri vəzifəsində çalışmış Robertson Politico-ya deyib: “Bu, ağrılı və çətin olacaq və siyasətçilər real təhlükələrin və risklərin nə olduğunu aydın bilməlidirlər”.
Robertson qeyd edir ki, Britaniya ictimaiyyəti ölkənin hərtərəfli hava və raket əleyhinə müdafiə sisteminə malik olmadığını “bilmir” və “əgər belə olsa, bu, daha çox hərbi xərclərin lehinə fikirlərini dəyişə bilərdi”. O, hökuməti müdafiə xərclərinin əhəmiyyətli artımından əvvəl seçicilərlə daha dürüst əlaqə saxlamağa çağırıb.
Böyük Britaniya ÜDM-in 2,3%-ni müdafiəyə xərcləyir. Bundan əvvəl London 2027-ci ilə qədər hərbi xərcləri ÜDM-in 2,5%-nə qədər artıracağını açıqlamışdı.Eyni zamanda, Böyük Britaniyanın baş naziri Key Starmer seçkiləri 2029-cu ilin avqustundan gec olmayaraq keçiriləcək növbəti parlamentdə müdafiə xərclərini ÜDM-in 3%-nə çatdırmağı son məqsəd adlandırmışdı.
2014-cü ildə Böyük Britaniyada keçirilən sammitdə NATO-nun ÜDM-in 2%-i həcmində hərbi xərclər hədəfi razılaşdırılıb və buna 10 il ərzində nail olunacaq. 2024-cü ilə qədər alyans ölkələrinin təxminən üçdə ikisi – 32 ölkədən 22-si ÜDM-in 2%-nə çatmışdı. NATO-nun iyun ayında Haaqada keçirilən sammitində 2034-cü ilə qədər Avropanın hərbi xərclərinin ÜDM-in 5%-ə çatdırılması barədə qərar qəbul edilib. (Tass)