Naxçıvanla bağlı sahibkarlarla kiçik qruplar formalaşdırıb işləməyi planlaşdırırıq. Çünki burada qənnadı, tikinti, mebel və digər məhsullar istehsal edən müəssisələr mövcuddur. Düşünürük ki, bunların qrup halında fəaliyyətini təşkil edib xarici bazarlara çıxış imkanını birgə reallaşdıra bilərik.
Bu sözləri AZƏRTAC-ın Naxçıvan bürosuna müsahibəsində “Azexport” portalının rəhbəri Ayxan Qədəşov söyləyib.
O deyib: “Naxçıvan Muxtar Respublikasının yerləşdiyi coğrafi mövqe bizə imkan verir ki, burada fəaliyyət göstərən müəssisələrin istehsal etdiyi keyfiyyətli məhsulları geniş bazarlara daha rahat şəkildə çıxaraq. Belə ki, logistik baxımdan Naxçıvanın Avropa ölkələrinə, həmçinin açıq dənizlərə çıxışı daha rahatdır. Bu baxımdan düşünürəm ki, burada istehsal olunan məhsulların həm keyfiyyət, həm də logistika baxımından xarici bazarlar üçün potensialı genişdir. Bu istiqamətdə sahibkarlarla birgə əməkdaşlığı təmin edəcəyik. İnanırıq ki, tezliklə Naxçıvanda istehsal olunan məhsulların “Azexport” portalı vasitəsilə daha geniş bazarlara çıxışı təmin olunacaq”.
Portalın rəhbəri qeyd edib ki, Azərbaycan Respublikasının bütün bölgələrində sahibkarların xarici bazarlara yeni, daha müasir vasitələrlə çıxış imkanlarının artırılması üçün müxtəlif təlim, tədbir və görüşlər keçirilir. Artıq Naxçıvanda da bu istiqamət üzrə bir qrup sahibkarla görüş reallaşdırılıb. Sahibkarlara ixrac üçün tələb olunan sənədlər, xarici bazarlara çıxmaq yolları, elektron ticarət imkanları barədə məumatlar verilib. “Azexport”la yanaşı, “Amazon”, “eBay” “Alibaba” və digər portalların iş prinsipləri haqqında ilkin informasiyalar təqdim olunub.