Naxçıvan Qızlar və Şərur Şəhər Fizika-Riyaziyyat Təmayüllü liseylərə ölkə üzrə mərkəzləşmiş qaydada qəbul imtahanı keçirilib

Naxçıvan Muxtar Respublikası Təhsil Nazirliyinin mətbuat xidmətindən AZƏRTAC-ın bölgə müxbirinə bildirilib ki, imtahanlarda VI və VII sinifləri bitirən şagirdlər iştirak ediblər.

Naxçıvan Qızlar Liseyinə 63, Şərur Şəhər Fizika-Riyaziyyat Təmayüllü Liseyə isə 234 şagird imtahan verib. İmtahanda şagirdlərə Azərbaycan dili və riyaziyyat fənlərindən qapalı test formasında, ümumilikdə, 60 sual təqdim olunub və 150 dəqiqə vaxt ayrılıb. Liseylərə ən yüksək nəticə göstərən 60 şagird qəbul olunacaq. İmtahan nəticələri iyulun 9-dan etibarən şagirdlərin elektron yerdəyişmə portalında (sy.edu.az) yerləşdiriləcək.

Qeyd edək ki, ötən tədris ilindən muxtar respublikada liseylərə qəbul ölkə üzrə mərkəzləşmiş qaydada aparılır.