Azərbaycan Respublikası Prezidentinin Sərəncamı ilə təsdiq olunan “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda Ailə Sağlamlıq mərkəzlərinin yaradılması və həmin mərkəzlərin müasir tibbi avadanlıqlarla təchiz edilməsi nəzərdə tutulub.
Naxçıvan Muxtar Respublikası Səhiyyə Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, proqram çərçivəsində nazirlik tərəfindən Ailə Sağlamlıq Mərkəzlərinə rentgen aparatı, hematoloji analizator, EKQ, USM və digər zəruri avadanlıqlar alınıb. Bu avadanlıqların bir qismi ötən gün təhvil verilib, qalan hissəsi isə qısa müddət ərzində təhvil alınacaq.
Qeyd edək ki, həyata keçirilən bu təşəbbüs muxtar respublikanın bölgələrində yaşayan sakinlər üçün xüsusilə əhəmiyyətlidir. Ailə Sağlamlıq mərkəzlərində bir çox tibbi yoxlanışın və diaqnostik xidmətin yerindəcə aparılması sayəsində sakinlər artıq uzaq məsafələr qət etmədən, vaxt və maddi resurslarına qənaət edərək yüksək keyfiyyətli tibbi xidmətlərdən faydalana bilirlər.