Naxçıvan Baş Gömrük İdarəsinin Rəsmiləşdirmə Mərkəzində xarici ticarət iştirakçıları və gömrük təmsilçiləri ilə növbəti görüş keçirilib.
İdarədən AZƏRTAC-ın Naxçıvan bürosuna bildirilib ki, görüşdə gömrük sistemində tətbiq edilən yeniliklər və layihələrlə bağlı biznes nümayəndələrinin məlumatlandırılması, qarşılıqlı etimad mühitinin gücləndirilməsi, idxal-ixrac zamanı mal və nəqliyyat vasitələrinə dair məlumatların öncədən təqdim olunması ilə təhlükəsizliyin və ticarətin asanlaşdırılmasının təmin edilməsinin gömrük orqanlarının qarşısında prioritet hədəflər kimi müəyyənləşdirildiyi diqqətə çatdırılıb.
Gömrük əməkdaşları tərəfindən biznes nümayəndələrinə “XİF MN tövsiyə sistemi və ondan istifadə”, “SİO statusunun verilməsi” qaydaları haqqında və “ÖZÜNET” layihəsi barədə videotəqdimatla ətraflı məlumat verilib.
Tədbirin sonunda daşıyıcı şirkətlərin nümayəndələrinin təklifləri dinlənilib və onları maraqlandıran suallar ətraflı cavablandırılıb.