Cari ildə 8 600-dən çox müəllim rəqəmsal savadlılığın artırılması istiqamətində təlimlərdə iştirak edib. Təlimlər ölkənin müxtəlif bölgələri üzrə təşkil olunub.
Bu barədə AZƏRTAC-a Elm və Təhsil Nazirliyindən məlumat verilib. Bildirilib ki, ümumi təhsil müəssisələrinin müəllimləri üçün “Microsoft” sertifikatlı pedaqoq” adlı beynəlxalq sertifikatlaşdırmaya hazırlıq təlimlərində 1 307 nəfər iştirak edib. Sözügedən sertifikatlaşdırma pedaqoji işçilərin texnoloji savadlılığını qiymətləndirmək, müxtəlif səviyyələrdə innovativ texnologiya və metodikaların təhsilə tətbiqini öyrənmək məqsədi daşıyan beynəlxalq proqramdır.
Elektron resursların hazırlanması və istifadəsi bacarıqları üzrə təlimlərdə isə 1 418, informatika müəllimləri üçün “Python” proqramlaşdırma təlimlərində 355 müəllim bilik və bacarıqlarını inkişaf etdirib. Ölkə üzrə 4 500-dən artıq inzibati və pedaqoji heyət üçün isə elektron qiymətləndirmə üzrə təlimlər təşkil olunub.
Qeyd edək ki, hər il keçirilən təlimlərin məqsədi müəllimlərin İKT üzrə bilik və bacarıqlarını təkmilləşdirmək, daha səmərəli istifadə imkanlarını artırmaqdır. Təlim proqramına şagirdlərdə internet resurslarından düzgün istifadə vərdişlərinin formalaşdırılması da daxildir.