Ağdam rayonu Azərbaycana qarşı təcavüzkar müharibədə ən çox zərərə məruz qalmış ərazilərindən biri olub.
“Report”un Qarabağ bürosu xəbər verir ki, bunu Baş Prokurorluğun İstintaq idarəsinin rəisi Nemət Əvəzov Ağdam şəhərində “Konstitusiya və Suverenlik: Hüquqi Dövlətin Təməli” mövzusunda keçirilən regional konfransda çıxışı zamanı deyib.
O qeyd edib ki, Ağdam rayonunun mərkəzi hesab edilən rayon tabeli 1 şəhər, 1 qəsəbə və 81 kəndi Ermənistan təcavüzü nəticəsində 1992-1994-cü illər ərzində işğal edilib, ümumilikdə 100 mindən artıq sakini didərgin salınıb, yalnız Ağdam rayonu üzrə 31,736 ədəd dövlət və xüsusi mülkiyyətə 4 milyard manata yaxın maddi ziyan vurulub.
O vurğulayıb ki, 2024-cü ilin dekabr ayında 15 şəxs barəsində cinayət işi Bakı Hərbi Məhkəməsinə göndərilib:
“30 ildən çox müddət ərzində hər gün törədilmiş cinayət faktları üzrə sübutları toplamaq və dəqiq faktlara söykənmək prokurorluq və onun istintaqçıları üçün həddindən çox məsuliyyət tələb edən bir iş idi.
Haqqında söz açdığım cinayət işi 1300 cinayət işini, sübuta yetirə bildiyimiz 2548 cinayət epizodunu özündə birləşdirir, 5559 cilddən, ona əlavə edilmiş çoxsaylı maddi sübutlardan, təqsirləndirilən şəxslərə verilmiş ittihamları özündə birləşdirən 150 cilddən ibarət ittiham aktından ibarətdir”.