Qəzza zolağında İsrail və Fələstinin HƏMAS radikal təşkilatı arasında qarşıdurma çətin və uzun olacaq; yəhudi dövləti üçün bu, “fərqli növ düşmənlə fərqli bir müharibədir”, lakin israillilər bu döyüşdə qalib gələcəklər. Bunu İsrailə səfərə gələn ABŞ prezidenti Co Baydenlə görüşündən sonra İsrailin baş naziri Benyamin Netanyahu deyib.
Baydenə müraciət edən Netanyahu, görüşdə nümayəndələrinin də iştirak etdiyi hökumətinin “birləşdiyini və İsraili qələbəyə aparmağa qərarlı olduğunu” vurğulayıb. “Bu, fərqli bir müharibə olacaq, çünki HƏMAS fərqli bir düşməndir” deyən baş nazir bir daha HƏMAS-ı Qəzzada dinc əhalidən canlı qalxan kimi istifadə etməkdə günahlandırıb.
O əlavə edib ki, İsrail üçün “qələbəyə gedən yol uzun və çətin olacaq”. (Tass)
