Yaponiya və NATO təhlükəsizlik məsələləri ilə bağlı həssas məlumatların sürətli mübadiləsi üçün təhlükəsiz xüsusi rabitə xəttinin yaradılması haqqında danışıqlar aparır. Bu barədə “Nikkei Asia” Yaponiya hökumətindəki mənbələrə istinadən məlumat yayıb.
Qeyd edildiyi kimi, mexanizm kiberhücumlar və dezinformasiyanın yayılması kimi təhlükələrə operativ reaksiya verməyə kömək edəcək. Çox güman ki, tərəflər hazırda NATO üzvlərinin istifadə etdiyi sistemə oxşar sistemi tətbiq edəcəklər. Rabitə xəttinin işə salınmasının dəqiq vaxtı hələ müəyyən edilməyib.
Tokio və Brüssel hazırda şəxsi əlaqələrdə məxfi məlumat mübadiləsi aparmağa məcburdurlar. Bu, koordinasiyanı çətinləşdirir və dərhal reaksiya tələb edən hər hansı böhran yaranarsa, ciddi nəticələrə səbəb ola bilər. Eyni zamanda, nəşr qeyd edib ki, NATO üzvlərindən biri Çinlə münasibətləri gərginləşdirmək istəmədiyi üçün bununla razılaşmasa, kommunikasiya xəttinin yaradılması üzrə danışıqlar bir sıra çətinliklərlə üzləşə bilər.
Son illər Yaponiya NATO ilə əməkdaşlığı fəal şəkildə genişləndirir. Baş nazir Fumio Kişida artıq iki dəfə alyans sammitlərində iştirak edib. NATO-nun Brüsseldəki qərargahında Yaponiyanın daimi nümayəndəliyi fəaliyyət göstərir. (Tass)